នារសៀលថ្ងៃទី៣ ខែកុម្ភៈ ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានដឹកនាំកិច្ចប្រជុំពិភាក្សាការងារជាមួយប្រធានគណៈកម្មការទាំង១០នៃព្រឹទ្ធសភា ប្រធានក្រុមសមាជិកព្រឹទ្ធសភាប្រចាំភូមិភាគទាំង៨ និងប្រធានគណៈកម្មការក្រមសីលធម៌សភារបស់សមាជិកព្រឹទ្ធសភា ក្រោមរបៀបវារ៖ ការរៀបចំវេទិកាពាក់ព័ន្ធនឹងវិស័យផ្សេងៗ ការរៀបចំផែនការប្រចាំឆ្នាំ ឬ/និងប្រចាំនីតិកាល និងបញ្ហាផ្សេងៗ នៅសាលពិសេស៣ វិមានព្រឹទ្ធសភា។

ឯកឧត្តមបណ្ឌិតអនុប្រធានទី២ព្រឹទ្ធសភា បានសង្កត់ធ្ងន់ថា ការរៀបចំធ្វើវេទិកាសំខាន់ណាស់ ជាការចែករំលែកព័ត៌មាន និងផ្សាភ្ជាប់ រវាងអង្គនីតិបញ្ញត្តិ និងអង្គនីតិប្រតិបត្តិ និងជាពិសេសជាការ ផ្សព្វផ្សាយចំណេះដឹង និងព័ត៌មានពិត ដើម្បីទៅបន្សាបព័ត៌មាន មិនពិត ដែលធ្វើឱ្យមានចលាចលសង្គម និងជាការបំពេញមុខងារ តំណាងក្នុងការផ្សព្វផ្សាយព័ត៌មានទៅដល់ប្រជាជនតាមប្រព័ន្ធផ្សព្វផ្សាយ។

កិច្ចប្រជុំ បានពិភាក្សាអំពីការត្រៀមខ្លួន សម្រាប់សមាជរដ្ឋសភា និងព្រឹទ្ធសភា នាពេលខាងមុខ ក្នុងនោះការងារស្រាវជ្រាវ និងប្រមូលព័ត៌មាន គឺជាការងារសំខាន់ណាស់ ដើម្បីចូលរួមយោបល់ និងអនុសាសន៍ ប្រកបដោយប្រសិទ្ធភាព និងស័ក្តសិទ្ធភាពខ្ពស់។

ឯកឧត្តមបណ្ឌិតអនុប្រធានទី២ បានលើកឡើងពីការរៀបចំផែនការយុទ្ធសាស្រ្តប្រចាំនីតិកាលទី៥ របស់ព្រឹទ្ធសភា តាមទម្រង់ស្តង់ដារួមមួយ ដើម្បីជាទិសដៅដល់ការធ្វើផែនការប្រតិបត្តិប្រចាំឆ្នាំរបស់គណៈកម្មការនីមួយៗ។
កិច្ចប្រជុំប្រព្រឹត្តទៅនៅសាលប្រជុំពិសេស៣ វិមានព្រឹទ្ធសភា។

ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន